يهلال الحزن والنوح والعبره عليمن جاي وحسيني انگطع
يهلال الحزن والنوح والعبره
عليمن جاي وحسيني انگطع نحره
****
شما انساك يهلال الالم تطلع
وصوره امن الحزن بسماي تتوزع
انه امن سنين گلبي بكربله تگطع
خلص من يوم عاشر هل گلب صبره
****
تذكرني تريد بيا هضم منهن
بمتوني الشمر بالسوط ورمهن
لون بسكينه ورقيه بحبل جرهن
لون عالگاع حره اتطيح عالحره
****
بعدها جروح من الطف تعاشرني
بدموعي تمسيني وتصبحني
كل حيلي خذته كربله مني
وانه بلا حيل هسه وحسرتي حسره
*
حگي لو صرت من البچي غيمه
بعدها بشيلتي ريحة حرگ خيمه
اشمنها وترد افكاري للهيمه
بكل شوك الاسحگه نابته جمره
****
مو من الخيم يهلال هل عله
العله البيه من ركضاتي للتله
ردت بس الگمر عباس اندله
ردت من الكفلني لو فقط نظره
****
اصيح وصوتي ما يوصل لبو الغيره
يا عباس اخيتك طاحت بحيره
بعد ساعه وتطب المدري يا ديره
انه زينب حسافه امشي متيسره
****
عسن ميته ولا عالهزله صعدوني
اديه مچتفه وللشام ودوني
بخرابه شلون زينب انا گعدوني
وراس حسين جدامي انضرب ثغره
****


الشاعر اياد الديراوي
ليلة الوداع سولفتلي دموعك من لزمت اضلوعك خايف
ليلة الوداع

سولفتلي دموعك من لزمت اضلوعك
خايف تگول باچر خيول اتهشِمك
1
هذي اول مره خويه عني درت عيونك
بلون حرگ خيامي باچر ليش صاير لونك
بعده ما بين فجرنه ونته حمره جفونك
خلي نتوادع يغالي گبل ليذبحونك

ايدي حطها ابيدك ارد اشم اوريدك
هسه الوداع باچر ضياع ويألِمك
2
اعليه خايف ما تگلي ليش بنفاسك حزن
صبري اكبر من دموعك ما يهم جرح الجفن
انا ادري الخيل باچر بصدرك اتدور حظن
گبل لتهشم ضلوعك ارد ابوسنهن وون

هسه ونة خاطر اهون امن العاشر
خلها تنوح روح اعله روح وتكلِمك
3
بعمر ورده اوياك احسن لچن من دونك دهر
هيه بس هالليله يمك وباچر اتطشر نهر
حاسبه احساب الخيامي ودري تاليها مفر
لاچن اجبينك يخويه شلون تنصاب بحجر

من تفيظ دمومك خويه تخفي رسومك
ارماد الخيام وبين السهام اتوهمك
4
راح اصبر صبر امي لمن ايضربوني
بلون هاي الشيله باچر خويه لون امتوني
والحبل بچفوفي شِده انظر ايمنعوني
ارفع ايدي حتى اودعك وكلهم ايجروني

خاطري ايكسرونه اوداعك ايمنعونه
اه يالغريب منظر عجيب ما يرْحَمَك
5
باچر اعله الرمح راسك خويه يفتر بالطفوف
راح افزع للكفلني ولو ما عنده چفوف
ارد اگله انهظ عضيدك صار طعمه للسيوف
اشرح الحال ابونيني السهم ميخليلهه شوف

مگطعات اچفوفه والسهم سد شوفه
بدم الزنود خويه اعله جود چن راسِمَك
6
لا تخافت خويه صوتك بقت ساعه للكلام
باچر اعله الناگه انه ونته عالغبره تنام
ليل الله يهل عبايه شلون يخلص هالظلام
ستري يالغالي بخيامي وما تظل هاي الخيام

تحترگ هالخيمه وانه افر بالهيمه
صوت الحنين اه ياحسين ايحشِمك
****

الشاعر اياد الديراوي
الانصار بطوله شرفها بينه ينقاس بطوله ختمها بچفه
الانصار

بطوله شرفها بينه ينقاس
بطوله ختمها بچفه عباس
الشمس رادت ضوانه
نطيناها دمانه
ختمها بچفه عباس
1
لمينه اعله سيف الموت ضمايرنه ومشاعرنه
وكتبنه اعله الطفوف إشعار غير حسين ما عدنه
العدد كل ما كثر بالطف تطيح دروع من عدنه
مو بس عابس اعله حسين كلنه اوياه تجننه

مفاخر كتبها مدمع العين
مفاخر نِضحي كلنه لحسين
ترف رايه ابسمانه
نطيناها دمانه
ختمها بچفه عباس
2
جمد صوت الحرب والخوف بگلوب الزلم سيطر
صحيح احنه العدد سبعين بس اعلينه من يگدر
يا جيش اليرد السيف اذا فوگه انكتب حيدر
عددنه ما زغر بيهم عددهم بينه ظل يزغر

مراجل فخرها رفعة السيف
مراجل هممها تاخذ الحيف
بطولتنه رجانه
نطيناها دمانه
ختمها بچفه عباس
3
نطينه انذار ما ننذل نذلهم ما يذلونه
اجينه بصيت ابو الحسنين فنهم لو يلاگونه
الجبال اتطيح وكت الكيف لكن ما يطيحونه
شمسنه المنها راد اخيال نِحط الليل بعيونه

نذلهم صوارم صارت اخيال
نذلهم حرايب تطلب ارجال
ملاحمنه هوانه
نطيناها دمانه
ختمها بچفه عباس
4
تسيدنه وملكنه الريح هجمنه ومحد اتقدم
تقدمنه وعجاج الخيل برگاب الزلم خيم
مثل عباس صار الزود من ازنوده نتعلم
خنگ بچفوفه جرف الماي حتى بهاي ما يرحم

نعرفه حسبها نظرة الماي
نعرفه بوفائه يبقه سگاي
ندگ مثله لوانه
نطيناها دمانه
ختمها بچفه عباس
5
تناثر منه ريح الغيظ وزعنه المراجل عين
اليحط اباله حرگ اخيام من صولتنه يشرد وين
كل واحد نزع روحه ودرع خلاها يم حسين
خيم زينب ضمايرنه الضمير اتربه عدهم زين

خيمها وگفنه وحنه لحيود
خيمها اليجيها منها ميعود
عقيلتنه بحمانه
نطيناها دمانه
ختمها بچفه عباس
6
ما يكفينه بس مره نموت اگبال ابو اليمه
كون بگد عددنه انموت فدوه احنه تحت جدمه
عسن نترس نهر عباس دمنه ولا يهل دمه
علينه الدنيه كون اتطيح ولا حافر يرض جسمه

نضحي عمرنه وصحنه هالصوت
نضحي فخرنه بحظرته انموت
النصرته ما سوانه
نطيناها دمانه
ختمها بچفه عباس
****

الشاعر اياد الديراوي
العليله ع ودعيهم يل عليله ما يردون واليهاجر
العليله ع


ودعيهم يل عليله ما يردون
واليهاجر للطفوف ايردلچ شلون
خل تهمل العين ما يرجع حسين
****
الليله ونه... طبع الاموادع يريد الكل يونون
هلي عينچ... يالعليله اوهل وداع ايذبل اجفون
ودعيهم... عنچ الليله الاهل كلهم يرحلون
شد ظعنهم.... اشما بچت عينچ يطفله ما يظلون

تبدي حسرات اومحن هاي المسيه
والظعينه اتوجهت للغاضريه
وشما عله اونين مايرجع حسين
****
يله نوحي .... والمنيه ابكربله منتظره لحباب
سلمي امرچ...للجليل اوكافي ياطفله إبهل إعتاب
الباري رايد... ينظر الزينب سبيه إبين الاجناب
اوهوه اعلم... من تفر العايله من حرگ الاطناب

هذا حكم الله الجليل اولازم انشوف
والدچ والصحبه تتوذر بل إسيوف
نسمع صده البين ما يرجع حسين
****
من تهاجر.....عنچ ارقيه الحنونه اويه الضعينه
ودعيها........ما تردلچ ياوسف لرض المدينه
اهناكه تصرخ.......وين ابونه الغالي طول ما يجينه
يالعليه.......ما درة بالغاظريه اموذرينه

جابو الراس ابطبق ورقيه حارت
شبگته اوفوگ الطشت هالطفله ماتت
والونه لثنين مايرجع حسين
****
تكبر اجروح...والجرح ينزف الم من تشهگ انفاس
صعبه ادري..لو بچت سكنه ابوداعچ والامل ياس
اويه الفواطم..باچر ابصوت اليتم تصرخ يعباس
گلبي ضامي... يمته ترجع للخيم وينك ينوماس

حشمت عمها الگمر سكنه الحبيبه
يمته شط العلگمي يمي تجيبه
راواها چفين ما يرجع حسين
****
ثوب الاسود...لبسي يافاطم قبل توديع الاكبر
اهناكه ليله...تلطم ابچف الحزن والونه تكبر
اوبعد اخبرچ.. ودعي عبدالله الرضيع ابدمعه تسعر
قبلي نحره...باچر ابسهم الحقد لونه أيتغير

باچر الاكبر وذر يا حالة امه
والرضيع النبله ياطفله التفطمه
واللوعه مرتين ما يرجع حسين
****
اشيبقه من حيل...اوعمتچ الحره الحزينه اتودعيها
إبچي سكته.. بآخر اوداع العقيله اتروعيها
چنها تعلم...فوگ تلها اتشوف اهلها امگطعيها
ودعتهم...اولليسر عمتچ يطفله امطلعيها

عالنهر كافلها وچفوفه اعله كتره
والدچ شمر اللعين ايحزله نحره
ياطفله ميتين ما يرجع حسين
****

الشاعر اياد الديراوي
يحيدر من اذكرك كلشي بيه ايطيب وما بين
يحيدر من اذكرك كلشي بيه ايطيب
وما بين الهواجس تشتفي العله
انه بحبك اعيش بكل زمن سلطان
تره بس اليبغظك عايش بذله
ما بين الضلام اشما تزيد ادروب
فقط دربك يبو الحسنين اندله
عرفتك وانا ما فاهم معاني الشوف
بصلب جدي وخيالك چنت اشرله
يالمعلمني لو دگ باب بيتي ايتيم
من جفني خبز ودموع اشتله
بخيت الچان يفگد والد ابوكتك
يحظر راسه حتى تروح تمسحله
لميت اعله صدرك كل حنان الله
بجلال الله فوگ الگاع تتجله
لو رايد نبي ربك علي ايسويك
ولكن صعبه عالمختار تتعله
اليصير ومهده كعبه والوحي ايلوليه
ابيت الطين عايش ياعلي فشله
بس بثوب مفتوگ املكتلك كون
تتواضع چنت حتى العمر يحله
يالمكسر خبز بچفوف قلعن باب
متهني وعله الصعبه گلت سهله
راحة بال ما تعرفها وتسليت
چنت نص الليالي بركعه تتسله
اليذكرك ياعلي ماحاجه شيعي يكون
احترام الاسمك الگالاها ادنگله
وجوب القبله ياحيدر خمس مرات
ونته بكل وكت يابالحسن قبله
من بحرك يحيدر افتهم گطره
والرايد علم هالگطره اوضحله
ولو غاليت بعض انفوس راح اتگول
انا ادري الخصم واگفلي عل زله
يكفرني يريد اشما يريد ايگول
لسان الحگ يحيدر لازم ايگله
علي القاهر علي القاسم علي الاول
علي منصب وصي من يگدر ايبدله
علي الكاسر علي الباسط علي المهيوب
علي برمشة جفن كون الله يجبله
علي القائم علي الراكع علي القرءان
علي هوه الفرض لو صله يركعله
علي التوحيد علي الضارب علي الميزان
علي حتى اويه مرحب شطرته عدله
علي الظاهر علي الباطن علي الحازم
علي كلمن يطيح بشده يندهله
علي الراحم علي الغافر علي الحاظر
علي يونس تنخه وراح يشفعله
علي الضامن علي الجنه علي المفتاح
علي بكل الذهب والله ما ابدله
چثير امن الكلام وما يصح تعبير
ماني مسولف انا بهل حچي كله
وحگ الاشر ورد الشمس مرتين
مسولفلك علم هل گطره بس بله
****

الشاعر اياد الديراوي
ميمر للقاسم ع بدال العرس قدم درس ابن
ميمر للقاسم ع

بدال العرس قدم درس
ابن الحسن منه اقتبس
هالدنيه لجل المظلوم ما تسوه شسع نعله
****
يالتلطم اعله حسين هاك اتعلم
اخذ العبر من جاسم وما تندم
باع الحياة وللمنيه اتقدم

طول وعرض دون الفرض
شينفع اذا تملك ارض
خمسة فروض بكل يوم وداعت الغالي سهله
*
بعز الشباب وحنته تنتظره
يتهنه لو يفدي العمر صار امره
شاف العطش بحسين يلهب جمره

بفيظ الدمع طفه الشمع
العمي الغريب ارد انصرع
من دمي يصرخ جسام حنيني گومي رمله
**

هوه الحسين الدين يعني المصحف
لِتحبه معقوله تِشمره اعله الرف
معصوم الك من السماء اتوضف

ماكو ظلم گلك جرم
بر الاهل يسوه اللطم
لو تبچي بالمجلس دوم هذا الدمع ميقبله
****
غير الحسين بدنيتك شيفيدك
صوب الرذيله بالك اتمد ايدك
لو ما مشيت بمنهجه ميريدك

باچر حشر وسط الگبر
ما يعتني لا تنتظر
بالاخره وبدنياك وحدك تظل ابذله
****
المن تزور وتتعب وتتعنه
الشايل سواد بگلبه لا يتمنه
لا يصرخ ارزقني يحسين الجنه

نال الظفر كلمن صبر
الله يبعده من سقر
اتمسك بدينك زين واجعل امامك قبله
****

الشاعر اياد الديراوي
نعي للسيده زينب ع يعيني دموع فرگه يالله
نعي للسيده زينب ع

****
يعيني دموع فرگه يالله صبي
خذت هالدنيه مني اعزاز گلبي

عشت عمري اشمن بس هواهم
حلالي الموت يا عيني وراهم

غريبه وغربتي ما منها چاره
اونن والگلب ملتهبه ناره

شكثر خوان عندي ودللوني
وسف بين الغرب وحدي اتركوني

لا صارت ولا معقوله يا ناس
اروحن للسبي وعضيدي عباس

عله الهزله انه واطفالي ماشين
اعوف شلون فوگ الغبره لحسين
****

الشاعر اياد الديراوي
نعي للرضيع ع ما شب عت بعد من
نعي للرضيع ع
****
ما شبْعت بعد من شوفك العين
غصب مني خذاك اوليدي هالبين
يشربك ماي يمه راد الحسين
ياهو الچان يدري تعود مذبوح
*
بعد يا ماي يوليدي يفيدك
رد بيك وسهم شابگ وريدك
گمطتك وشوفن ماد ايدك
شنو ذنبك ييمه وشاغت الروح
*
شاغت روحك ودمك يحنيك
عاين للمهد يمه يتانيك
يماي عيوني گلي شلون الوليك
دلل الولد ماتت واجه النوح
****

الشاعر اياد الديراوي
عبدالله عوف الماي بطولك ييمه لا يفجعونه نحرك
عبدالله عوف الماي بطولك ييمه لا يفجعونه
نحرك زغير اهواي بگد خنصر الباچر يگطعونه
****
امك انا ودري باليصير اعليك
ظل يوليدي وانا بدمعتي ارويك
ضامي والدك ما يقبل ايخليك
وحگ شهور عمرك ما يردن بيك

ساعدني يمه بهاي طولك اعيش شلون انه بدونه
نحرك زغير اهواي بگد خنصر الباچر يگطعونه
****
شلون بهل عمر يمه تفارگني
وسهر يوليدي ما شابع بعد جفني
اتاني اشگد يعبدلله تكلمني
وهسه اباول احچايه تودعني

عاشر ييمه ارباي ونسه العطش ومكاسر اضنونه
نحرك زغير اهواي بگد خنصر الباچر يگطعونه
****
حنان اشگد الك لميت وانتظرك
گلت تكبر وحط راسي على صدرك
ولكن رايد اتواسي الابو بنحرك
ذني اسهام اكبر يبني من عمرك

يسعر جمر بحشاي نحرك سهم يمه يلبسونه
نحرك زغير اهواي بگد خنصر الباچر يگطعونه
****
انه بمهدك احضر يبني صار اسنين
يسالني المهد باچر رضيعچ وين
مثلي راح يحتاجك يماي العين
شگله اونته رايد يبني سهم البين

يبچي المهد وياي مثلي دمه هم تنزف عيونيه
نحرك زغير اهواي بگد خنصر الباچر يگطعونه
****
تطيح الخيمه بس اتروح يالغالي
تفارگني ابد ما مرت ابالي
اطيح بروحتك والموت يبرالي
حال الطير يبني لو وگع حالي

عمري عشت بفياي وجهك شمس ما دورت دونه
نحرك زغير اهواي بگد خنصر الباچر يگطعونه
****

الشاعر اياد الديراوي
عيد الغدير انه بحبك يحيدر امتلك كلشي والما
🌹 عيد الغدير 🌹

انه بحبك يحيدر امتلك كلشي
والما عنده انته اشيمتلك گلي
املكت وجدان ذمه وغيرة العباس
وملكت الدنيه كلها وبيك متعلي
انه بعين الگلب شفتك يبو الحسنين
جبل راسي بجلال الباري متجلي
يشمس الله وينوره الما يلوحك شوف
لازم من نذكرك عالنبي انصلي


الشاعر اياد الديراوي

2819099

Каналов

109137067

Сообщений